राहाता :
राहाता शहरातील गणेश परिसरातील नागरिकांकडून महाराष्ट्र राज्य विधानपरिषद आमदारपदी निवड झाल्याबद्दल आमदार विवेक कोल्हे यांचा भव्य नागरी सत्कार आयोजित करण्यात आला होता. या कार्यक्रमात बोलताना आमदार विवेक कोल्हे यांनी नाव न घेता अप्रत्यक्ष निशाणा साधत स्वाभिमान, सहकार आणि जनतेच्या विश्वासाचा मुद्दा ठळकपणे मांडला.
कार्यक्रमाच्या सुरुवातीलाच आयोजकांनी गणेश परिसर असा उल्लेख केल्यानंतर विवेक कोल्हे यांनी तत्काळ दुरुस्ती करत हा फक्त गणेश परिसर नाही, तर स्वाभिमानी गणेश परिसर आहे, असे स्पष्ट शब्दांत सांगितले. या परिसरातील नागरिकांनी कोणत्याही दबावाला किंवा दहशतीला न जुमानता अन्यायाविरोधात उभे राहत दहशतीचे झाकण उडवले, असे म्हणत त्यांनी परिसरातील नागरिकांच्या धैर्याचे कौतुक केले.
आपल्या भाषणात त्यांनी पुढे सांगितले की, मी पुणतांबा येथून जात असताना काही नागरिकांनी माझी गाडी अडवली आणि गणेश कारखान्याच्या प्रश्नामध्ये लक्ष घालण्याची विनंती केली. त्यांची अपेक्षा रास्त आहे, कारण मी सहकार महर्षी स्वर्गीय शंकरराव कोल्हे यांचा नातू आहे. या विधानातून त्यांनी सहकार क्षेत्राशी असलेले आपले नाते अधोरेखित करत जनतेच्या प्रश्नांकडे दुर्लक्ष होणार नाही, असा अप्रत्यक्ष संदेश दिला.
विवेक कोल्हे यांच्या भाषणातील दहशत, स्वाभिमान आणि कारखान्याच्या प्रश्नात लक्ष घालणार या उल्लेखांमुळे राजकीय वर्तुळात विविध चर्चांना उधाण आले आहे. विशेष म्हणजे, कोणाचेही नाव न घेता त्यांनी केलेल्या या भाषणातून स्थानिक राजकारणातील दबावाच्या वातावरणावर भाष्य केल्याची चर्चा नागरिकांमध्ये रंगू लागली आहे.
या नागरी सत्कार सोहळ्यास परिसरातील नागरिक, कार्यकर्ते व विविध क्षेत्रातील मान्यवर मोठ्या संख्येने उपस्थित होते. कार्यक्रमात स्वाभिमानी गणेश परिसर हा उल्लेख विशेष चर्चेचा विषय ठरला.
